Një 29-vjeçar i dënuar me 4 vite burg për kultivimin të bimëve narkotikëve u ekstradua nga Greqia, bëri me dije këtë të Enjte Policia e Shtetit.
“Në kuadër të bashkëpunimit dhe koordinimit të veprimeve, nga ZQK Interpol Tirana u bë ekstradimi nga Greqia drejt Shqipërisë, i shtetasit shqiptar Elton Katuçi, 29 vjeç, banues në Durrës. Ky shtetas ishte shpallur në kërkim ndërkombëtar në bazë të vendimit të datës 01.07.2015, të Gjykatës së Rrethit Gjyqësor Durrës, e cila e ka dënuar me 4 vjet burg, për veprën penale ‘Kultivim i bimëve narkotike’”, njoftoi policia.
Më 14.10.2014, i riu, në bashkëpunim me një tjetër person, në afërsi të rezervatit të Rrushkullit, ka kultivuar lëndë narkotike të llojit kanabis sativa.
Ngjarja
Sipas hetimeve të prokurorisë, më datë 15.10.2014, nga ana e policisë gjyqësore është referuar materiali kallëzues për veprën penale në ngarkim të të pandehurve Bledar Kola e Elton Katuçi. Të pandehurit Bledar Kola e Elton Katuçi, më datë 14.10.2014, janë furnizuar me ushqime dhe kanë marrë me vete disa gërshëre e sende të tjera dhe kanë shkuar në brendësi të rezervatit të Rrushkullit ku kishin mbjellë dhe kultivuar një parcelë me kanabis.
Në momentin që dy të pandehurit po punonin tek parcela e mbjellë me lëndë narkotike, aty ka shkuar roja i rezervatit, shtetasi Eduart Xhaferri i cili ka parë të pandehurit me gërshërë në dorë, dhe më tej ka konstatuar një parcelë të rrethuar dhe në të kishte bime narkotike të prera.
Eduart Xhaferri ju ka bërë thirrje të pandehurve që të ndalojnë. Xhaferri deklaron se i pandehuri Bledar Kola ka nxjerre nga brezi një pistoletë dhe ja ka drejtuar atij. Roja, menjëherë, me çiften që kishte me vete, ka qëlluar nga këmbët për ta trembur. por Kola është larguar me shpejtësi.
Eduart Xhaferri ka njoftuar në Komisariatin e Policisë Durrës për ngjarjen e ndodhur për lëndën narkotike të konstatuar nga ana e tij.
Nga këqyrja e vendit të ngjarjes ka rezultuar se parcela ku ishin kultivuar bimët narkotike të llojit kanabis sativa ndodhet në rezervatin e Rrushkullit dhe është një parcelë me përmasa 30 x 20 metra.
Gjatë këqyrjes së vendit të ngjarjes u gjeten dhe morën në cilësinë e provës materiale 63 bimë narkotike të llojit kanabis sativa, të prera, dhe dy bimë të mbjella.
