Një grup emigrantësh shqiptarë, të iniciuar nga Lëvizja Patriotike Shqiptare, një faqe në rrjetin social, kanë marshuar dje në kryeqytetin e Mbretërisë së Bashkuar, Londër.
Me flamujt kombëtar në duar dhe simbole të tjera kombëtare, pa fjalime disa qindra emigrantë, zhvilluan marshimin e tyre, paqësisht, ndërsa kërkuan të drejtat e shqiptarëve brenda dhe jashtë vendit, votën e diasporës në zgjedhjet e 25 prillit dhe përshpejtimin e reformës në drejtësi.
Ky është marshimi i parë i këtij lloji të mbajtur në një kryeqytet europian, ndërsa në Tiranë vijojnë diskutimet mbi ndryshimet në Kodin Zgjedhor lidhur me listat e hapura dhe koalicionet parazgjedhore, ndërsa duket e pamunduar që diasporës t’i krijohet mundësia për të votuar atje ku jeton dhe punon.
Edhe pse përmes deklaratave të ndryshme diaspora ka kërkuar të përfaqësohet në Kuvend, edhe pse Edi Rama kishte premtuar përmbushjen e kërkesës për votimin e emigrantëve, duket se kjo çështje është lënë mënjanë gjatë diskutimeve mbi ndryshimet në Kod.
