Zbardhet shkresa që Kreu i KQZ-së Klement Zguri i ka dërguar Kuvendit të Shqipërisë dhe ku parashtron të gjitha argumentet pse është i detyruar të largohet dhe pse duhet të përshpejtohet puna për ngritjen e KQZ-së se re pas ndryshimeve kushtetuese.
Zguri shkruan se është i detyruar të ndërmarrë këtë hap, dhe se situata nuk është aspak normale dhe se duhet përgjegjshmëri për të vepruar sa më shpejt.
‘Situata kërkon reagim të shpejtë sepse zgjedhjet janë shpallur dhe lista e detyrave është tepër e gjatë’, shkruan Zguri.
Kryetari i Komisionit Qendror të Zgjedhjeve, Klement Zguri, ka dhënë dorëheqjen nga pozicioni, një muaj para mbarimit të mandatit. Zguri u emërua në këtë post pas marrëveshjes së 17 majit 2013 mes kryeministrit Rama dhe kreut të opozitës Basha. Më parë ai ishte anëtar i KQZ-së. I mbetur si i vetmi anëtar i KQZ i zgjedhur nga opozita, Zguri ka pasur shpesh përplasje dhe kundërshtime me anëtarët e tjerë të komisionit. Gjithashtu, ai nuk ka kandiduar për asnjë nga pozicionet e krijuara nga riformatimi i institucioneve të reja zgjedhore, të lindura nga marrëveshja e 5 qershorit mes socialistëve në pushtet dhe opozitës jashtë Parlamentit.
