Një plagosje është shënuar orët e para të mëngjesit në periferi të kryeqytetit. Në Kodër Kamzë, pronari i një lokali, pas një konflikti verbal, ka qëlluar me armë zjarri një klient, që ndodhej në lokalin e tij. Ky i fundit është plagosur në dorë, ndërsa policia ka arrestuar pronarin e lokalit.
Ngjarja
Burime zyrtare nga policia bënë me dije se “shërbimet e Komisariatit të Policisë Nr. 5, në bashkëpunim me forcën e posaçme ‘Shqiponjat’, pas njoftimit të marrë rreth orës 02:20, se në Kodër Kamzë, në një lokal, kishte një konflikt verbal e fizik mes pronarit të lokalit dhe një klienti, kanë shkuar menjëherë në drejtim të adresës së dhënë.
Bashkëpronari i lokalit, shtetasi F. K., 35 vjeç, banues në Tiranë, në brendësi të lokalit është përfshirë në një konflikt fizik e verbal për motive të dobëta, me shtetasin R.C. (klient lokali) dhe më pas konflikti ka vijuar në ambientet e jashtme të lokalit. Si pasojë e konfliktit shtetasi F.K. ka plagosur me armë zjarri në dorë, shtetasi R. C., 39 vjeç., i cili u dërgua në spital dhe ndodhet jashtë rrezikut për jetën.
Në momentin që shtetasi F. K. po qëllonte përsëri në drejtim të shtetasit të plagosur, ndërhyrja e punonjësve të Policisë ka bërë të mundur parandalimin e vrasjes, duke i hequr armën nga dora shtetasit F.K. dhe duke e prangosur atë.
Akuzat
Materialet hetimore në lidhje me këtë ngjarje i kaluan Prokurorisë pranë Gjykatës së Shkallës së Parë Tiranë, për veprime të mëtejshme, për veprat penale “Vrasja, e mbetur në tentativë” dhe “Armëmbajtja pa leje”, sqaroi policia.
