Enea Jorgji, arbitri shqiptar i FIFA-s, vuri drejtësi më sfidën e Europa League mes Ararat-Armeni dhe Fola.
Takim ky që shkoi në shtesë pasi koha e rregullt u mbyll barazim 3-3.
Ararat-Armeni, ekipi armen, po humbiste me rezultatin 1-3 deri në sekondat e fundit, kur Enea Jorgji iu akordoi dy penallti. Vendasit arritën të barazonin pasi u treguan të saktë nga pika e bardhë në minutat 90+1’ dhe 90+4’.
Madje, arbitri shqiptar tregoi dhe dy kartonë të kuq në këtë takim, duke ndëshkuar fillimisht ekipin e Ararat (Junior 45’) dhe më pas miqtë nga Luksemburgu (Pimentel 90+1’). Shumë punë për Enea Jorgjin në këtë takim.
Ndërkohë në minutat shtesë, ekipi armen arriti të shënojë edhe golin e katërt duke i çuar shifrat e përgjithshme në 4-3. Një përmbysje e madhe e vendasve ku protagonist ishte edhe Jorgji me dy penalltitë e akorduara në fund të kohës së rregullt.
