Armend Dallku është liruar nga detyrat e tij si trajner i Prishtinës. Ish-mbrojtësi i kombëtares nuk ia doli të dilte kampion vjet dhe tani duhet të presë ndonjë propozim tjetër për të vijuar karrierën si trajner.
“Prishtina ka ndërprerë bashkëpunimin me Dallkun. Klubi i dëshiron sukses në vazhdim të karrierës. Prishtina ka shkëputur bashkëpunimin me marrëveshje reciproke me kryetrajnerin Armend Dallku.
Dallku, si trajner i Prishtinës, skuadrën e ka udhëhequr në 35 ndeshje zyrtare (72% të suksesit, 23 fitore, 7 barazime dhe 5 humbje me gol-dallim 73:25) dhe është trajneri më i ri i klubit me trofeun e fituar të Kupës së Kosovës.
Ish-kapiteni i skuadrës ka regjistruar si futbollistë i Prishtinës 151 ndeshje zyrtare. Dallku do të mbetët ndër trajnerët më me autoritet i skuadrës. FC Prishtina i uron sukses në vazhdim të karrierës”, shkruhet në njoftimin e bërë nga Prishtina në rrjetet sociale.
Ndërkohë për sa i përket zëvendësuesit të tij, mediat kosovare bëjnë me dije se favorit është Zekerija Ramadani, i cili në të shkuarën në Dardani ka drejtuar skuadra si Trepça ’89 dhe Feronikeli.
