Preng Gjini, i cili ra pre e një atentati me lëndë plasëse mbrëmjen e së martës tashmë duket se është jashtë rrezikut për jetën. Ai është duke iu nënshtruar disa operacioneve në Spitalin e Traumës.
Mësohet se me mbërritjen në spital, fillimisht Gjini i është nënshtruar një operacioni në organet e brendshme. Bëhet e ditur se si pasojë e dëmtimit i është hequr një pjesë e zorrës. Ndërkohë gjatë ditës së sotme, preng Gjini i është nënshtruar një operacioni në dorë. Nga të dhënat bëhet e ditur se Gjini ka dëmtuar edhe syrin e djathtë dhe pritet që të ketë një tjetër ndërhyrje.
Por ajo që e ka shpëtuar nga vdekja është fakti se tritoli sipas mjekëve është vendosur në sediljen e pasagjerit. Sipas këtyre detajeve autorët e kanë ditur se Gjini udhëtonte gjithmonë i shoqëruar dhe asnjëherë nuk e drejtonte vet makinën. Por dje fati duket se ka qenë me të. Ai ka dalë vet me makinë duke mos u ulur në sediljen e pasagjerit, ku nëse do të kishte qenë aty, pasojat do të kishin qenë fatale.
