Evis Kushi është ministrja e re e Arsimit pas dorëheqjes së Besa Shahinit. Pas prezantimit të Kushit nga kryeministri Rama si ministre, në media u publikua një reagim i profesorit Vladimir Kola. Ky i fundit shpjegonte se në një artikull shkencor i Kushit, prezantuar në vitin 2010, rezulton 70 përqind plagjiaturë.
Ai ngriti dyshimin se, punimi mund të jetë përdorur nga ministrja e re si një ndër shkrimet shkencore, për të marrë tituj akademikë si Profesor i Asocuar ose Profesor.
Në një postim në rrjetet sociale, lidhur me detyrën e re, Kushi shprehet se, “do bëj gjithçka mundem që të nderoj Elbasanin tim, Partinë Socialiste dhe kryeministrin tonë, që kur të kthehem një ditë në auditor të kem respektin e të gjithë kolegëve të mi për atë që do të jem si drejtuese e arsimit”.
Kushi kujton se ka marrë doktoraturën në “Staffordshire University” në Britaninë e Madhe.
