Divorci nuk ka qenë një përvojë e lehtë për Kelly Clarkson, e cila i ka dhënë fund martesës 7-vjeçare me Brandon Blackstock. Lajmet se çifti i njohur po ndaheshin u zbuluan në fillim të qershorit. Dhe në një intervistë për “Sunday Today”, 38-vjeçarja foli për vështirësitë e përfundimit të martesës së saj.
“Nuk është më sekret. Jeta ime ka qenë pak e vështirë dy muajt e fundit,”- tha ajo. Ndërsa rrëfeu se ka gjetur mbështetje tek miqtë e saj, që kanë përjetuar divorcin.
“Unë kam biseduar me miq që janë divorcuar. Kjo është gjëja më e keqe ku dikush mund të përfshihet,”- shtoi këngëtarja.
Clarkson dhe 43-vjeçari ishin të martuar për gati 7 vite dhe kanë dy fëmijë së bashku, River, 6 vjeç dhe Remington, 4 vjeç. Ndërkohë drama e divorcit do të shërbejë si frymëzim për karrierën muzikore të saj.
“Albumi i ardhshëm do jetë ndoshta më personali që kam nxjerrë ndonjëherë. I gjithë albumi do jetë në thelb çdo emocion që kam përjetuar nga fillimi i marrëdhënies deri në fund, siç është tani,”- përfundoi këngëtarja.
