Kishte që nga viti 1994 që në Flushing Meadows, në finale nuk paraqitej një gjerman. Dhe nuk i kishte ndodhur asnjëherë një austriaku. E po ndodh në 2020. Bëhet fjalë për Alexander Zverev e Dominic Thiem, të cilët do të luajnë aktin e fundit të US open.
Por gjermani nuk e ka patur aspak të lehtë fitoren ndaj Pablo Carreño Busta. Ky i fundit ka qenë në avantazh të dy seteve dhe i kishte të gjitha mundësitë ta mbyllte ndeshjen në të tretin. Por këtu, fati luajti anën e tij më të keqe me Pablon.
Ndërsa gjuante shërbimin ai ndjen dhimbje në shpinë dhe detyrohet të marrë ndihmë mjekësore. Rikthehet në fushë por nuk është më i njëjti. Nga kjo përfiton kundërshtari i tij dhe arrin të fitojë tre sete radhazi. Përfundimisht, pas 3 orë e 22 minutash lojë, Zverev fiton 3-2 me sete 3-6, 2-6, 6-3, 6-4 dhe 6-3.
Tashmë në finale do të përballet me Thiem. Për austriakun kjo është finalja e katërt Grand Slam. Në gjysmëfinale ai mundi Daniil Medvedev në tre sete me një lojë të shkëlqyer pavarësisht një shqetësimi që ndjente në kyçin e dorës së djathtë, që iu dëmtua gjatë një rrëzimi, në përpjekje për të kapur topin.
Duke treguar forcën, cilësinë e lojës dhe vendosmërinë, Dominic Thiem mundi Daniil Medvedev 3-0, me 6-2, 7-6 e 7-6). Për t’u theksuar është se tenisti rus nuk kishte humbur asnjë set gjatë gjithë turneut, duke treguar se ishte një kundërshtar i fortë. US Open 2020 do të diskutohet midis Zverev dhe Thiem, finalja do të luhet të dielën.
