Dy qendra masazhi në ku ushtrohej aktiviteti i paligjshëm i prostitucionit janë zbuluar nga policia e Tiranës, që ka arrestuar administratorët e bizneseve.
Vëllezërit Mario Roshi, 26 vjeç dhe Andi Roshi, 29 vjeç, të dy banues në Tiranë, u vunë në pranga në kuadër të aksionit të koduar “Extra Service”, që erdhi pas të dhënave në rrugë operative të siguruara nga policia, se disa shtetase shfrytëzoheshin për prostitucion nga dy administratorë qendrash masazhesh. Qendrat ndodhen në zonën e njohur si “Pazari i ri”.
Nga hetimet e kryera ka rezultuar se dy vëllezërit, në bashkëpunim me njëri-tjetrin rekrutonin femra nëpërmjet rrjeteve sociale me pretendimin për ti punësuar si masazhatore për të kryer masazhe relaksuese për klientët e këtyre qendrave. Pasi i rekrutonin paraprakisht dhe i punësonin, këta shtetas i detyronin që përveç masazhit tu ofronin klinetëve edhe shërbime seksuale brenda këtyre qendrave të masazhit. Mes vajzave të punësuara kishte edhe punonjëse të mitura.
Në përfundim, klientët bënin pagesën për shërbimin e masazhit dhe shërbimet seksuale që ata përfitonin dhe këto përfitime ndaheshin ndërmjet administratorëve të këtyre qendrave dhe punonjëseve që kryenin këto shërbime.
Po në vijim të operacionit, u procedua penalisht për veprën penale “Moskallëzim krimi shtetasja S.D., 21 vjeçe, e cila në cilësinë e menaxheres të një prej qendrave, nuk ka treguar për këtë aktivitet të kundraligjshëm që kryhej brenda kësaj qëndre masazhi.
Gjithashtu u proceduan penalisht për veprën penale “Prostitucioni” 5 shtetase.
“Nga ana jonë vijojnë hetimet për bashkëpunëtorë të tjerë në këtë veprimtari kriminale si dhe për identifikimin e klientëve që kanë përfituar shërbime seksuale në këto qendra masazhi. Materialet i kaluan Prokurorisë së Rrethit Gjyqësor Tiranë, për veprat penale “Prostitucionit”, “Shfrytëzimi i prostitucionit” “Mbatjes së lokaleve për prostitucion” dhe “Moskallzimit të krimit” në ngarkim të shtetasve të lartpërmendur” – njoftoi Policia.
