Një 31-vjeçar në Maliq është arrestuar nga policia si i dyshuar për vjedhjen e një dyqani në fshatin Sheqeras. Ngjarja ka ndodhur me 30 gusht.
Në pranga ka përfunduar shtetasi Skerdi Lamçe, 31 vjeç, banues në fshatin Sheqeras dhe i dënuar më parë disa herë për veprën penale “Vjedhja”.
“Shtetasi i mësipërm më datë 30.08.2020, ka vjedhur në dyqanin e shtetasit V. Q., në fshatin Sheqeras, artikuj të ndryshëm ushqimorë dhe paketa cigare në vlerën 20.000 lekë, si dhe ka kanosur nëpërmjet telefonit vajzën e pronarit të dyqanit”, njoftoi policia.
Gjithashtu 31-vjeçari, në momentin që ka qenë i shoqëruar në ambientet e Komisariatit Korçë ka tentuar të largohet, por u kap menjëherë dhe u prangos nga policia.
Materialet i kaluan Prokurorisë të Rrethit Gjyqësor Korçë për veprat penale “Vjedhja”, “Kanosja”, “Përdorimi me keqdashje i thirrjeve telefonike” dhe “Largimi i të burgosurit nga vendi i qëndrimit, mbetur në tentativë”, shtuan të njëjtat burime.
