Një 25-vjeçar nga Kosova u arrestua në Morinë, pasi gjatë kontrollit në makinën e tij iu gjet një pistoletë “Zastava” dhe municion luftarak.
Sipas njoftimit të policisë, 25 vjeçari D.D, banues në Istog, iu nënshtrua kontrollit të imtësishëm në vijën e dytë, ku në automjetin tip “Citroen” iu gjet arma dhe municionet.
“Në përfundim të veprimeve hetimore, Specialistët për Hetimin e Trafikut të Paligjshëm dhe Narkotikëve në DVP Kukës, bënë arrestimin në flagrancë të shtetasit D. D., 25 vjeç, banues në Istog, Kosovë, për veprën penale “Armëmbajtja pa leje”.
Specialistët për Hetimin e Trafikut të Paligjshëm dhe Narkotikëve në DVP Kukës në bashkëpunim me Prokurorinë e Rrethit Gjyqësor Kukës, po vijojnë hetimt për zbardhjen e plotë të kësaj ngjarje, identifikimin dhe kapjen e personave të cilët i kanë shitur armën e zjarrit këtij shtetasi”, thuhet në njoftimin e policisë.
Materialet do t’i kalojnë Prokurorisë së Rrethit Gjyqësor Kukës për veprime të mëtejshme.
