Ish-kryeprokurorja e Krimeve të Rënda, Donika Prela po përballet me Kolegjin e Posaçëm të Apelimit, pasi Komisioneri Publik kërkoi shkarkimin e saj nga detyra për shkak të problemeve me pasurinë.
Në muajin Korrik, Donika Prela ka kërkuar përjashtimin nga trupa gjykuese, të gjyqtareve Natasha Mulaj dhe Ina Rama. Prela ka kërkuar përjashtimin e Ramës dhe Mulajt, me argumentin se janë në kushtet e konfliktit të interesave. Prela i tha trupës gjykuese se Natasha Mulaj nuk mund të jetë pjesë e trupës gjykuese, pasi ka nën hetim vëllezërit e saj për një çështje pronësie. Ndërsa, për Ina Ramën, Prela tha që nuk mund të gjykojë rastin e saj, pasi i ka hetuar mbesën disa vite më parë, për falsifikim diplome.
Në seancën e kësaj të Enjteje, kërkesat e Donika Prelës për përjashtimin e Natasha Mulajt dhe Ina Ramës, janë rrëzuar.
Komisioneri Publik Florian Ballhysa u shpreh se kërkesa e Prelës për përjashtimin e Ina Ramës dhe Natasha Mulajt nga trupi gjykues është përpjekje e saj për të zvarritur dhe vonuar procesin.
