Aktori i njohur francez, Gerard Depardieu u arrestua nga policia teksa po udhëtonte me një skuter në rrugët e Parisit ditën e premte më 28 gusht. Oficerët që patrullonin me makinë vërejtën një motorr, shoferi i të cilit nuk respektonte rregullat e qarkullimit, veçanërisht duke kaluar semaforët me të kuqe. Pasi u ndalua, aktorit iu kërkua të kryente testin e alkoolit, ku rezultoi i dehur, raporton Le Point.
Pavarësisht se policia e njohu pasi hoqi kokoren, Depardieu nuk i shpëtoi arrestimit. Ai u dërgua në stacionin e policisë, ku qëndroi për disa orë. Për këtë shkelje të kryer, Depardieu u gjobit nga policia franceze.
Kjo nuk është hera e parë që protagonisti i filmit “Cyrano de Bergerac” arrestohet për një episod të këtij lloji. Në verën e vitit 2013, Depardieu u arrestua për drejtimin e motoçikletës në gjendje të dehur dhe dhunë verbale ndaj oficerëve të policisë. Gjykata e gjobiti atë me shifrën prej 4,000 euro dhe i pezulloi lejen e drejtimit për 6 muaj.
