Gjykata e Tiranës ka lënë në qeli ish-ushtarakun Fatmir Demiri, të akuzuar për vrasjen me sende të forta të 61-vjeçarit Dorian Latollari, në Tiranë. Gjykata vendosi masën e sigurimit “arrest me burg pa afat”, në përputhje me kërkesës e prokurorisë.
Krimi dyshohet se ka ndodhur për konflikte pronësie.
Demiri, 37-vjeç, u arrestua të Premten e javës së kaluar.
Ngjarja
Ishte një telefonatë që vuri në lëvizje policinë, që njoftonte se në rrugën “Haxhi Hysen Dalliu”, në oborrin e banesës së tij, 61-vjeçari ishte gjetur pa shenja jete.
Specialistët për Hetimin e Krimit në Komisariatin e Policisë Nr.3, nën drejtimin e Prokurorisë, arrestuan autorin e dyshuar: Fatmir Demiri, banues në Tiranë.
Burime zyrtare nga policia bënë me dije se “37-vjeçari e ka pranuar autorësinë dhe është shprehur se për disa konflikte të mëparshme, (dyshohet për konflikte pronësie), me vetëpërgjegjësi, ka goditur me sende të forta duke i shkaktuar vdekjen Dorian Latollarit”.
Demiri ka qenë i dënuar më parë për dezertim nga shërbimi Ushtarak.
