Një aksident me vdekje ka ndodhur në Golem mesditën e kësaj të Hënë. Një e re ka humbur jetën dhe një tjetër është plagosur. Mjeti me të cilin ato lëviznin u përfshi në një aksident të trefishtë.
“Rreth orës 12:00, në aksin rrugor tek Rrethi i Golemit në drejtim të Malit të Robit, janë përfshirë në aksident 3 mjete me drejtues shtetasit R.R., J.L., dhe M.D. Si pasojë e përplasjes është dëmtuar drejtuesja e mjetit M.D., dhe pasagjerja në mjetin e saj, të cilat u dërguan menjeherë në spital”, njoftoi policia.
Një prej të plagosurave nuk ka mundur të mbijetojë, konfirmuan burime nga spitali i Durrësit.
Ndërkaq, grupi hetimor dhe shërbimet e Policisë ndodhen në vendngjarje dhe vijon puna për zbardhjen e plotë të rrethanave të ngjarjes.
Aksidenti ka sjellë trafik të rënduar në zonë.
