60 kompjutera i janë dhuruar katër shkollave në Pogradec me iniciativën e studiusesit Erald Kapri i ndihmuar nga një filantrop tepër i njohur, mik i tij. Lajmin e bënë të ditur Kapri i cili në një status në Facebook shprehet se si një studiues i brezit të ri nuk mund rrinte pa dhënë ndihmesën e tij për shkollat e qytetit të lindjes, Pogradec. Kapri shprehet se me këtë veprim i ka kthyer qytetit një borxh të vogël.
“Pikërisht ky është drejtimi në të cilin duhet punuar dhe ku ia vlen të investohet çdo qindarkë”, thotë Kapri. .
Postimi
U KRY! 😊 Si pjesë e një brezi të ri studiuesish, rritur në qytetin e Lasgushit dhe Mitrushit nuk mund të rrija duarkryq kur mësova se gjimnazi më i madh i Pogradecit, ku po marrin edukim e mësim 700 nxënës, ka vetëm 6 kompjutera, mjet kaq shumë i nevojshëm studimor në ditët e sotme, ku dija dhe dëshira për eksplorim është e pakufijshme.
Me ndihmën e një miku të shtrenjtë filantrop, sot u mundësuan 60 kompjutera për nxënësit e Pogradecit në shkollat “Muharrem Çollaku”, “Gjergj Pekmezi”, “Enver Qiraxhiu” dhe “Servet Agolli”. Të tjerë kompjutera në vazhdim do vihen në dispozicion për shkollat e tjera në qytet dhe Mokër.
Sot i ktheva një borxh të vogël këtij qyteti që më ka dhënë shumë nga kultura e tij dhe më ka mbrujtur me dashurinë për librat e investimin në arsim.
Pikërisht ky është drejtimi në të cilin duhet punuar dhe ku ia vlen të investohet çdo qindarkë.
Pa një brez të mirëarsimuar, nuk mund të ketë shpresë e as të ardhme! Një falenderim për dy miqtë e mi, Fatmir Lamçen dhe pogradecarin Alban Berberi.
