Një person i konsideruar nga policia “me rrezikshmëri shoqërore”, është vënë në pranga në Vlorë. Indrit Hita, 36 vjeç u arrestua pasi u kap me armë zjarri pa leje, bënë me dije burime zyrtare.
“Bazuar në informacionet e marra në rrugë policore nga Forcat Operacionale pranë DVP Vlorë për një person me rrezikshmëri për komunitetin i cili qarkullonte me armë zjarri, është organizuar dhe finalizuar operacioni policor i koduar ‘Fast’. Forcat Operacionale pranë DVP Vlorë në bashkëpunim me shërbimet e Komisariatit të Policisë Vlorë, gjatë operacionit, në lagjen ‘1 Maji’ në Vlorë, pranë një lokali kanë kapur dhe vënë në pranga 36 vjeçarin, banues në Vlorë, person me precedent të theksuar kriminal në fushën e krimeve ndaj personit. Gjatë kontrollit personal, në çantën e krahut, iu gjet dhe iu sekuestrua në cilësinë e provës materiale, 1 armë zjarri pistoletë model ‘Beretta’ me një krëhër me fishekë luftarak”, njoftoi policia.
Materialet në ngarkim të tij iu referuan Prokurorisë Vlorë për veprën penale “Prodhimi dhe mbajtja pa leje e armë shpërthyese dhe municionit”, shtuan të njëjtat burime.
