Greqia po kërkon zgjerimin e ujërave të saj territorial nga 6 në 12 milje detare, në përgjigje të krizës aktuale me Turqinë për të drejtat e shpimit në Mesdheun Lindor.
Kjo shtrirje, thotë Euroneës, duhet të ndodhë përgjatë brigjeve të saj që shohin për nga Italia, në perëndim, ndërkohë që nuk prek direkt territorin e kthyer në mollë sherri me Ankaranë.
Duke cituar kryeministrin grek, Kyriakos Mitsotakis, media e njohur thekson deklaratën e tij përpara parlamentit vendas se “Greqia po heq dorë nga dekada të tëra politike të jashtme pasive”.
Në të njëjtën kohë, presidenti turk Rexhep Tajip Erdogan e paralajmëroi Athinën të mos testojë as durimin, dhe as kurajon e vendit të tij. “Turqia do të marrë atë që i takon me të drejtë në Mesdhe, në Egje dhe në Detin e Zi. Për këtë kemi të vendosur të bëjmë gjithë çfarë është e nevojshme në rrafshin politik, ekonomik, por edhe ushtarak. Turqia nuk ia ka vënë syrin asnjë territori, sovraniteti apo interesave të dikujt tjetër. Por ne nuk do të bëjmë asnjë lëshim për atë që na përket”, tha Erdogan.
Ministri i jashtëm grek, Nikos Dendias e akuzoi Turqinë se po vazhdon të provojë fqinjin e saj dhe të shpalosë një ideologji “neo-otomane”.
Në kohën që në flasim, Turqia vazhdon të provokojë dhe të përshkallëzojë tensionet, u shpreh ai.
