Një 54-vjeçar në Lazarat është vënë në pranga për veprat penale “Prodhimi dhe mbajtja pa leje e armëve luftarake dhe municionit”, “Prodhimi dhe shitja e lëndëve narkotike” dhe “Kultivimi i bimëve narkotike”.
Në banesën e Sh.B., 54 vjeç, efektivët e policisë së Gjorokastrës gjetën armë dhe një sasi droge.
Aksioni policor i koduar “Sopoti” u zhvillua pas informacioneve të marra në rrugë operative se në lagjen “Përroi Selime”, Lazarat, një shtetas dispononte armë zjarri dhe lëndë narkotike, bënë me dije burime zyrtare.
Gjatë kontrollit në banesën e shtetasit SH.B., në një vend të përshtatur në bodrumin e shtëpisë, shërbimet e Policisë gjetën të fshehura 1 armë zjarri kallashnikov, 1 pushkë, 4 krëhëra, 900 fishekë, një sasi prej 15.5 kg lëndë narkotike kanabis sativa (në trajtë pluhuri dhe mbetje bimore) të cilat u sekuestruan në cilësinë e provës materiale.
Gjithashtu gjatë kontrollit të ushtruar u konstatuan dhe disa bimë të kultivuara në oborrin e banesës së tij.
