Episodi i radhës i dhunës në familje është shënuar në periferi të kryeqytetit, ku një i moshuar ka goditur me thikë bashkëshorten. Kjo e fundit ndodhet në spital në gjendje të rëndë, ndërsa i moshuari, me precedent të mëparshëm penale në krimet kundër personit, është vënë në pranga.
Burime zyrtare nga policia bënë me dije se efektivët e komisariatit 5 shkuan në banesën e çiftit pas një telefonate që informonte për një konflikt në familje, në rrugën “Manhatan”, në Kamëz.
“Në momentin që shërbimet e Policisë janë afruar për të hyrë në banesë, shtetasi N.P., 73 vjeç, sapo ka parë punonjësit e Policisë ka tentuar të largohet, por është kapur dhe arrestuar nga shërbimet e Policisë. Shtetasi N. P., pas një konflikti për motive të dobëta ka goditur me thikë bashkëshorten e tij, e cila ndodhet në spital, në gjendje të rëndë shëndetësore. Në përfundim të veprimeve u bë arrestimi i shtetasit N.P., për veprën penale ‘Vrasja për shkak të marrëdhënieve familjare’ dhe materialet procedurale i kaluan Prokurorisë, për veprime të mëtejshme”, njoftoi policia.
Efektivët kanë sekuestruar dhe thikën me të cilën autori kreu plagosjen.
