Stjuart Smakaj, një nga personat e dyshuar si të përfshirë në vrasjen e Gledis Krajës, mbrëmjen e djeshme në Shkodër, është arrestuar. 23-vjeçari Kraja u qëllua me kallashnikov rreth orës 21:55, në lagjen “Daniel Matlija”. Ai u transportua i plagosur në spital, por ndërroi jetë.
Stjuart Smakaj ka patur miqësi me Gledis Krajën, gjë që e dëshmojnë dhe komentet mes tyre në rrjtet sociale.
Ndërkohë Sebastian Smakaj, vëllai i të arrestuarit, është ende në kërkim lidhur me krimin.
Arrestimi
“Falë rrethimit të zonës, kontrolleve të shumta në bashkëpunim me FNSH dhe presionit të ushtruar nga forcat e policisë duke mbajtur në rrethim zonën ku fshihej autori, si dhe pas negociatave me familjarët, u bë e mundur vënia e tij në pranga”, njoftoi policia.
Të njëjtat burime shtuan se u sekuestrua dhe arma e krimit.
“Në cilësinë e provës materiale janë sekuestruar arma e zjarrit 18 gëzhoja të qitura nga kjo armë zjarri, automjetet të cilat janë të palëve në konflikt, si dhe vijon puna intensive për dokumentimin ligjor të kësaj ngjarjeje”.
Vrasja
Sipas grupit hetimor, 23-vjeçari Gledis Kraja nuk ishte objekiv i sulmit.
“Sebastian Smakaj, gjatë një konflikti të çastit ka tentuar të vrasë me armë zjarri shtetasin D. H., ku si pasojë aksidentalisht ka ngelur i plagosur rëndë shtetasi 23-vjeçari banues në lagjen ‘Perash’, Shkodër, i cili më pas ka ndërruar jetë në Spitalin Rajonal Shkodër”, njoftoi policia.
Ndaj dy vëllezërve, janë ngritur akuzat për veprat penale “Vrasja me dashje, e kryer në bashkëpunim” dhe “Mbajtja pa leje e armëve dhe municionit”.
