Prej disa javësh është raportuar se, Michael Ngoo, nuk do të jetë më pjesë e Tiranës, ndërsa për këtë lajm nuk ka pasur asgjë zyrtare.
Ndërkohë që së fundmi konfirmimi për largimin e tij ka ardhur nga vetë sulmuesi. 27-vjeçari në një intervistë të gjatë për “The Guardian ka rrëfyer se dëshiron të luajë në një kampionat më të mirë ku do të ketë mundësinë të tregojë veten.
Ai gjithashtu nuk ka harruar të falënderojë klubin bardheblu për mikpritjen teksa ka theksuar se tifozët i falnin dashuri për përkushtimin që tregonte në fushën e lojës.
“Nuk isha mirë në Angli. Po kaloja kohë të vështira dhe isha thuajse në depresion. Më kalonin shumë gjëra në kokë. Kisha nevojë të ndryshoja ambient, më erdhi oferta nga Shqipëria dhe thashë ‘Po’”.
“Doja të shënoja gola, por kisha probleme me muskujt, nuk isha ende gati. Duhet të punoja që të mësohesha me trupin tim. Vrapimi im ishte i ri dhe duhet të adoptohesha me trupin tim të ri.
“Sezonin e parë që luajta te Tirana nuk isha në formën time më të mirë. Kisha dhe pak frikë kur ika, nuk e dija se çfarë më priste, por pas sezonit të parë u ndjeva mirë dhe isha gati për një tjetër hap. Nëse nuk do të jepja 100% në fushë, kam dyshime se tifozët do të më respektonin siç e kanë bërë. Tirana është një klub historik në Shqipëri, ata kanë fituar më shumë kampionate.
“Tifozët e pëlqenin përkushtimin tim dhe më falnin dashuri, më mirëpritën. Ata e dinin se nuk do të qëndroja gjatë, por në fund qëndrova për 3 vite dhe nuk e kisha menduar kështu. Më vjen keq që nuk do të luaj në Champions League, ata më donin sërish, por e ndjeva se ishte koha e duhur për të bërë një tjetër hap në jetën time. Bëra ca hapa mbrapa, por tani mund të rishfaq talentin tim në një kampionat më të mirë”, – tha ai.
