Gazeta turke “Yeni Safak” i ka kushtuar një artikull tensioneve të krijuara midis Turqisë dhe Greqisë, rreth pretendimeve për burimet hidrokarbure në rajon.
“Ankaraja zyrtare ri-dërgoi anijen e saj “Oruç Reis” në Mesdhe si një mënyrë për t’u zgjeruar përmes kufirit të hartës absurde mbi të cilën Greqia dhe Egjipti arritën një marrëveshje pasi ata e përpiluan atë sipas tekave të tyre. Sigurisht që u dërgua, dhe përpara se kjo të ndodhte u morën në konsideratë të gjitha mundësitë”, thuhet në artikull.
Anija eksploruese e Turqisë, “Oruç Reis” ishte dërguar në rajon edhe më 21 korrik. Flotat turke dhe greke ishin gati të përlesheshin me njëri-tjetrin. Sidoqoftë, kur kancelarja gjermane Angela Merkel zhvilloi një takim me Presidentin Rexhep Tajip Erdogan, Turqia i dha Athinës një shans tjetër.
Sipas disave, të dy vendet ishin kthyer nga pragu i luftës.
“Sidoqoftë, Athina nuk arriti të shfrytëzojë rastin dhe në vend të kësaj bëri një marrëveshje me Egjiptin. Ajo krijoi një front anti-Turqi. Më parë kishte bërë një marrëveshje të ngjashme me Italinë që e kufizonte Shqipërinë brenda Detit Adriatik. Ndërsa tani veçse i afrohet pragut të luftës me Turqinë në Egje dhe Mesdhe, po përshkallëzon gjithashtu një krizë jashtëzakonisht kritike në Perëndim me Shqipërinë”, vijon më tej në artikull kryeredaktori i gazetës turke, İbrahim Karagül.
“Oruç Reis do të lëvizë në të gjithë zonën e përcaktuar brenda kornizës së marrëveshjes Turqi-Libi. As Egjipti dhe Athina nuk do të jenë në gjendje të bëjnë asgjë për ta kundërshtuar këtë. Këtë herë, ata do të gjejnë Turqinë shumë më të vendosur. Nga ishulli Meis në veri të Egjeut, çdo zonë mund të shndërrohet në një zonë konflikti. Ata e dinë këtë. Ata e dinë vendosmërinë e Turqisë.
Nëse Oruç Reis kapet, apo nëse ndodh një “aksident”! Shekulli i Mbrojtjes ka mbaruar …”, shkruhet më tej në median pro qeveritare.
“Duket se përpjekjet për të “bllokuar” Turqinë në Egje dhe Mesdhe do të marrin reagime serioze këtë herë. Turqia nuk do t’i përgjigjet kurrë planeve për ta rrethuar atë nga Mesdheu Lindor në Libi. Kjo për faktin se Turqisë iu desh të heshte për një shekull të tërë, ndërsa detet e saj po plaçkiteshin. Por tani: Shekulli i mbrojtjes ka mbaruar. E nëse ka ndonjë ngacmim fizik në operacionet e Turqisë, nëse ka ndonjë “aksident”, e gjithë zona që përmenda do të bëhet zonë konflikti”, shkruan İbrahim Karagül, duke e cilësuar në fund të artikullit gushtin si “muajin e fitores.”
