5 muaj nga duelet e saj të fundit, Champions League rikthehet t’i japë fund fazës finale e cila është lënë pezull në ndeshjet e kthimit të fazës së 1 të 16-ave.
Real Madrid udhëton drejt Anglisë me disavantazhin 2-1 kundrejt Manchester City-t nga ndeshja e parë. Zinedine Zidane ka lënë jashtë listët së të thirrurve për këtë sfidë, Gareth Bale, marrëdhënia me të cilin tashmë është totalisht e shkëputur.
Real nuk do të ketë në dispozicion për këtë përballje as kapitenin Sergio Ramos, i ndëshkuar me karton të kuq në takimin e parë.
Nga krahu i anglezëve, Pep Guardiola vijon të rreshtojë skuadrën pa sulmuesin e dëmtuar, Kun Aguero, por që gjithsesi ka në dispozicion thuajse të gjithë kontigjentin e lojtarëve.
Misioni i përmbysjes i përket edhe bardhezinjve të Maurizio Sarri, të cilët në Francë u mundën minimalisht nga Lyon. Juventus do të presë kundërshtarët në Torino, me shpresën e rikuperimit të Paolo Dybalas i cili pësoi një tërheqje në takimin përballë Sampdorias në kampionat. Argjentinasi i është bashkuar skuadrës ditët e fundit dhe optimizmi i bardhezinjve është i lartë për ta parë në fushë përkrah Cristiano Ronaldos.
Përballë “Zonjës së Vjetër” do të jetë Lyon, skuadër e cila luajti përpara pak ditësh ndeshjen e parë zyrtare, finale e Kupës së Ligës ndaj PSG, që prej bllokimit të pandemisë. Fituesit e këtyre dy çifteve do të formojnë duelin e parë çerekfinal të Champions League që do të zhvendoset në Lisbonë për fazën finale të turneut. /a2news
