Deputeti Enver Roshi, i cili është infektuar me Covid 19, është dërguar për mjekim të specializuar në Turqi. Ai u shtrua dy ditë më parë në repartin e terapisë intesive në spitalin “Shefqet Ndroqi”, ndërkohë që tashmë ka shkuar drejt Turqisë, raporton Faxnews.
Burime bëjnë me dije se Roshi ka pasur probleme me mushkëritë, ndërkohë që është rasti i tretë, që dërgohet nga spitalet Covid për trajtim jashtë vendit.
Dy rastet e para janë dy biznesmenë të njohur, që janë dërguar jashtë për kurim.
Prej javësh situata me Covid 19 në vendin tonë paraqitet e rëndë, ndërkohë që aktualisht në të dy spitalet Covid janë duke u trajtuar 124 pacientë, 18 janë në terapi intensive, 7 prej të cilëve pacientë të intubuar.
Në spitalet Covid, ajo që mund të evidentohet është fakti se asnjë nga pacientët e intubuar nuk ka mundur të shpëtojë, ndërkohë që numri i jetëve të humbura që prej fillimit të pandemisë ka shkuar në 154.
