Trajneri i Kombëtares Shqiptare, Edoardo Reja, ka thurur elozhe për mbrojtësin shqiptar të Veronës, Marash Kumbulla.
Reja gjatë një prononcimi për të përditshmen L’Arena, citon disa nga cilësitë më të mira të qendërmbrojtësit nga Malësia e Madhe. Ai e quan 21 vjeçarin si një lojtar të madh dhe se zotëron teknikë dhe karakter.
“Ai është një futbollist me perspektivë të shkëlqyer, e pret një e ardhme super. Zotëron teknikë dhe personalitet, unë e konsideroj që tani një lojtar të madh.
Ai është i kompletuar nga çdo këndvështrim i mundshëm dhe mendon vetëm të luajë futboll. Kjo është shumë e rëndësishme. Napoli e kishte arritur akordin me të, por Kumbulla preferoi të priste, sepse nuk ndihej gati.
Aty e kuptova që ai e ka mendjen në vend. E di që është i ri dhe ka nevojë të gjejë ekipin e duhur për të pasur mundësinë të luajë dhe të rritet“, deklaron trajneri i kombëtares kuqezi.
