Dy persona janë vënë në pranga lidhur me të shtënat me armë të regjistruara mbrëmjen e djeshme në Velipojë.
Sipas policisë, Fatjon Prela, 28 vjeç, banues në Shkodër dhe Albert Firkuçja, 30 vjeç, banues ne fshatin Rec të Velipojës, tentuan të vrisnin me armë zjarri dy persona të tjerë.
Është shpallur në kërkim dhe njëri prej shtetasve që u qëllua me armë, pasi iu kundërpërgjigj autorëve po me zjarr.
Ngjarja
Burime zyrtare njoftuan se strukturat e Drejtorisë Vendore të Policisë Shkodër dhe të Stacionit të Policisë Velipojë, pas njoftimit të marrë mbrëmjen e djeshme se në afërsi të një lokali në Velipojë ishin dëgjuar të shtëna me armë, kanë shkuar në adresën e dhënë. Efektivët arritën të vinin në pranga dy autorët dhe sekuestruan me automjetin me të cilin ishin larguar nga vendngjarja pas të shtënave.
Në përfundim të veprimeve të para hetimore u bë arrestimi i dy autorëve.
Nga tërësia e veprimeve hetimore rezultoi se në bashkëpunim me njëri-tjetrin, në afërsi të një lokali në Velipojë, rreth orës 22:20 të mbrëmjes së djeshme, ata kanë tentuar të vrasin me armë zjarri, për motive të dobëta, shtetasit I.H., 31 vjeç dhe G. M., 36 vjeç, të dy banues në Shkodër.
Autorët, pas ngjarjes, janë larguar në pyll, por janë kapur nga forcat e Policisë së DVP Shkodër. Gjatë kontrollit u janë gjetur edhe disa doza me lëndë narkotike kanabis, të cilat u sekuestruan së bashku me mjetin në pronësi të 28-vjeçarit Prela.
Ndaj tyre rëndon akuza për veprat penale “Vrasja në rrethana cilësuese”, e mbetur në tentativë, e kryer në bashkëpunim, “Armëmbajtja pa leje” dhe “Prodhim dhe shitja e lëndëve narkotike”.
Gjatë konfliktit, shtetasi I.H. ka qëlluar me armë zjarri pistoletë, duke dëmtuar mjetin e Fatjon Prelës, me të cilin po largoheshin të dy autorët. Ndërsa shtetasi G.M. është lënduar lehtë dhe pas marrjes së ndihmës së parë është larguar në banesë.
Në vijim të veprimeve hetimore, u bë shpallja në kërkim e shtetasit I.H., për veprat penale “Vrasja në rrethana cilësuese” e mbetur në tentativë, “Armëmbajtja pa leje” dhe vijon puna për kapjen e tij.
Po ashtu, “vijon puna për zbardhjen e plotë të rrethanave të ngjarjes, identifikimin dhe kapjen e autorëve të tjerë të implikuar në këtë ngjarje, si dhe krehja e zonës, për gjetjen e armëve që kanë përdorur autorët”, njoftoi policia.
