Një mjet luksoz tip ”Audi R8” me targë “MKBT71”, është djegur në orët e para të mëngjesit të sotëm, në qytetin e Vlorës.
Ngjarja ka ndodhur në zonën e ”Ujit të Ftohtë”, në një prej parkimeve pas një pallati aty pranë. Ambienti përreth është i pajisur me kamera biznesesh të cilat janë marrë nga policia si provë materiale, teksa djegia e automjetit dyshohet se është e qëllimshme.
Dyshohet se makina tip ”Audi” të jetë spërkatur me benzinë ku më pas është djegur thuajse e gjitha, e dëmtuar më së tepërmi në pjesën e përparme të saj.
“Rreth orës 05:18, në aksin rrugorë Vlorë-Ujë i Ftohtë, pranë një hoteli është djegur në pjesën e përparme auomjeti tip Audi-A8 në pronësi të një pushuesi, i cili nga hetimet paraprake dyshohet se është djegur qëllimisht me lëndë djegëse benzinë, për motive ende të paqarta”, njoftoi policia.
Pronari i automjetit është Burim Zyberi, një shqiptar nga Kërçova e Maqedonisë me banim në Gjermani, i ardhur vetëm 4 ditë më parë për pushime.
Ai ka pranuar se nuk ka asnjë konflikt me askënd teksa ngjarjen e cilëson të dyshimtë e i kërkon policisë të mbledhë kamerat e sigurisë.
”Nuk kemi konflikt me asnjë. Kemi ardhur me pushime, ndodhin këto gjëra, shumë keq. Jetoj në Gjermani. Policia po heton, të shohim çfarë do ndodhë. Kamerat e kanë kapur, të shohim”, tha ai për Ora News.
Vlora është ndër ato qytete me numrin më të lartë të automjeteve të djegura. Që prej fillimit të këtij viti më tepër se 10 automjete janë djegur, makina të cilat kanë pësuar defekte, shkëndija elektrike, të djegura qëllimisht apo edhe automjete të përdorura në atentate.
