Nga BoldNews.al
Juristi Envi Hicka është tërhequr nga gara për në Gjykatën Kushtetuese, një ditë pasi “Boldnews.al” publikoi ekskluzivisht, problemet e shumta që ILDKPKI ka identifikuar në pasurinë e tij dhe të bashkëshortes së tij, gjyqtares Alma Hicka, e cila nga ana e saj garon për një vend në Gjykatën e Lartë.
Envi Hicka ka paraqitur dorëheqjen nga kandidimi mesditën e të Premtes së kësaj jave, pak para se Këshilli i Emërimeve në Drejtësi (KED) të shqyrtonte aplikimet për dy vende vakante në Gjykatën Kushtetuese.
Ndërkaq, Këshilli i Emërimeve në Drejtësi, pas një mbledhje maratonë, e mbyllur rreth orës 11 të mbrëmjes së të Premtes, njoftoi se nga 9 aplikimet për vakancat në Gjykatën Kushtetuese, asnjëri nuk konfirmohet për të vijuar garën.
Sipas një njoftimi zyrtar të Këshillit të Emërimeve në drejtësi, 3 prej aplikantëve kanë dhënë dorëheqjen. Krahas juristit Envi Hicka, janë dorëhequr paraprakisht edhe Klodian Rado dhe Prel Martini.
Ndërkohë, Këshilli i Emërimeve në Drejtësi ka ndaluar kandidimin e 6 aplikantëve të tjerë, për shkak të problematikave të konstatuara gjatë procedurës verifikuese.
Sipas KED, ndalohen të kandidojnë për vakancat në Gjykatën Kushtetuese aplikantët: Besnik Muçi, Ardita Alsula, Shaqir Hasanaj, Vjosa Bodo dhe Vasil Bendo e Dedë Kasneci, të cilët kanë kandiduar përe dy vakancat.
Pas këtij rezultati, KED pritet të njoftojë organet e emërtesës, e konkretisht Kuvendin e Shqipërisë dhe Presidentin e Republikës, për të shpallur thirrjen e re për dy vende vakante në Gjykatën Kushtetuese.
Gjithësesi, koha e thirrjeve të reja është e kushtëzuar nga fakti nëse do të ketë ankimime të aplikantëve të ndaluar për kandidim në Gjykatën e Apelit Administrativ.
E plotë, KED: Ja rezultati i konkurimit
Këshilli i Emërimeve në Drejtësi (KED), në datën 17.07.2020, zhvilloi mbledhjen e tij të radhës, e cila zgjati deri në orët e vona, me këtë rend dite:
1. Shqyrtimi i gjetjeve në procedurën e verifikimit për kandidatët për vendin vakant, vakancë e parakohshme në Gjykatën Kushtetuese, të rishpallura nga Kuvendi i Shqipërisë në datën 21.08.2019 dhe Presidenti i Republikës në datën 27.09.2019
2. Vendimmarrja lidhur me lejimin/ndalimin e kandidimit të kandidatëve të mësipërm .
Shqyrtimi i rasteve të kandidatëve për vendet vakante për gjyqtar në Gjykatën Kushtetuese është vendosur në përfundim të procedurave të verifikimit rigoroz dhe të thelluar të ndjekura nga Këshilli, sipas ligjit dhe standardeve tashmë të njohura e të aplikuara që kërkohen për përzgjedhjen, qenien dhe konfirmimin në detyrën e magjistratit apo anëtarit të Gjykatës Kushtetuese.
Këshilli i Emërimeve në Drejtësi, pasi shqyrtoi aktet dhe procedurën e ndjekur për verifikimin e kandidaturave dhe dokumentacionin e përgatitur lidhur me plotësimin e kushteve ligjore për kandidim, për secilin kandidat të përcaktuar në rendin e ditës, pasi dëgjoi mendimin e Avokatit të Popullit lidhur me procedurën e ndjekur në verifikimin e kandidaturave, vendosi:
Përfundimin e procedurës së verifikimit, vlerësimit, pikëzimit dhe renditjes për shkak të tërheqjes së tyre nga kandidimi, të kandidatëve;
1. Klodian Rado, për vendin vakant të shpallur nga Kuvendi, në datën 21.08.2019
2. Prel Martini, për vendin vakant të shpallur nga Presidenti i Republikës, në datën 27.09.2019
3. Envi Hicka, për vendin vakant të shpallur nga Presidenti i Republikës, në datën 27.09.2019
Ndalimin e kandidimit të kandidatëve për gjyqtar në Gjykatën Kushtetuese si më poshtë:
1. Besnik Muci, për vendin vakant të shpallur nga Presidenti i Republikës, në datën 27.09.2019, referuar vendimit të Komisionit të Posacëm të Apelimit.
2. Ardita Alsula, për vendin vakant të shpallur nga Kuvendi, në datën 21.08.2019
3. Shaqir Hasanaj , për vendin vakant të shpallur nga Presidenti i Republikës, në datën 27.09.2019.
4. Shaqir Hasanaj , për vendin vakant të shpallur nga Kuvendi, në datën 21.08.2019;
5. Vjosa Bodo , për vendin vakant të shpallur nga Kuvendi, në datën 21.08.2019
6. Vjosa Bodo , për vendin vakant të shpallur nga Presidenti i Republikës, në datën 27.09.2019.
7. Vasil Bendo, për vendin vakant të shpallur nga Presidenti i Republikës, në datën 27.09.2019.
8. Dedë Kasneci, për vendin vakant të shpallur nga Presidenti i Republikës, në datën 27.09.2019.
9. Dedë Kasneci, për vendin vakant të shpallur nga Kuvendi, në datën 21.08.2019
Kandidatët për të cilët është vendosur ndalimi, kanë patur mangësi të një apo disa kushteve të parashikuara nga Kushtetuta dhe ligji. Vendimet e plota dhe të zbardhura për ndalimin e kandidimit të tyre do të publikohen të arsyetuara në faqen elektronike të Gjykatës së Lartë, në pjesën e caktuar për Këshillin e Emërimeve në Drejtësi. Kandidatët kanë të drejtën e ankimit në Gjykatën Administrative të Apelit, jo më vonë së 5 ditë nga dita e njoftimit të vendimit të arsyetuar.
