Bujar Osmani nga Bashkimi Demokratik për Integrim, në konferencën për shtyp pas mbylljes së votimeve, ka vlerësuar zgjedhjet e sotme si të qeta dhe të rregullta. Ai falënderoi votuesit dhe u shpreh se tani është koha për bashkëpunim duke i bërë thirrje partive shqiptare që ti bashkohen idesë për kryeministrin e parë shqiptarë.
“Nga nesër duhet të fillojnë aktivitete me palët tjera për të formuar qeveri të udhëhequr nga kryeministri shqiptar. Për këtë qëllim ftojmë partitë e tjera shqiptare në vend të bashkohen në kauzën tonë të përbashkët. Sot, ne presim një fitore të madhe për BDI para se të gjithash këto zgjedhje do të mbahen mend si një fitore e madhe për shqiptarët dhe qytetarët e vendit”, tha mes tjerash Osmani.
Në garë për të fituar ulëse në përbërjen e re parlamentare janë 1,578 kandidatë të 15 partive politike dhe koalicioneve, por beteja kryesore zhvillohet mes dy partive maqedonase, LSDM-së së ish kryeministrit, Zoran Zaev dhe partisë më të madhe opozitare VMRO DPMNE që drejtohet nga Hristijan Mickovski si dhe dy partive shqiptare, Bashkimit Demokratik për Integrim të Ali Ahmetit dhe koalicioni Aleanca-Alternativa që drejtohet nga Zijadin Sela.
Në këto zgjedhje për herë të parë që nga pavarësia e Maqedonisë së Veriut në vitin 1991, u krijua një koalicion parazgjedhor midis një partie maqedonase dhe një partie nga blloku shqiptar. LSDM dhe Lëvizja Besa garojnë së bashku në këto zgjedhje.
Lexo edhe:
