Sulmuesi i njohur, Claudio Pizarro, i ka dhënë lamtumirë futbollit të luajtur dhe mbylli karrierën e tij si futbollist duke qenë pjesë e Werder Bremen.
Ndaj këtij lajmi ka reaguar, Milot Rashica, i cili i ka dhënë “lamtumirën” legjendës së Bundesligës. Përmes një statusi në rrjetet sociale, ylli i Kosovës i ka dërguar mesazhe mirënjohjeje dhe vlerësimi për peruanin.
“Ti ke qenë një model për mua, që kur u bashkova me Werderin! Çfarë karriere mbresëlënëse, miku im! Gjithë të mirat për të ardhmen! Shijoje kohën me familjen tënde tani! Legjendë!” – ka shkruar sulmuesi shqiptar.
Pizarro u tërhoq në moshën 41-vjeçare dhe pas ka lënë një karrierë të gjatë teksa ka provuar sukses me skuadra të mëdha si Bayern Munich dhe Chelsea, por edhe me Werder Bremen për të cilët ka luajtur plot 10 sezone. Me Bayern Munich ai është shpallur 6-të herë kampion i Bundesligës, ndërsa ka fituar Ligën e Kampioneve dhe Superkupën e Evropës në sezonin 2012-2013.
Në karrierën e tij, Pizarro ka shënuar 337 gola në 872 paraqitje për klube dhe kombëtaren e Perusë.
