Vëllazëria Ungjillore Shqiptare doli në një deklaratë për mediat këtë të hënë duke mohuar që familja Josifi të ketë lidhje me ato që predikohen në kishat e tyre.
Ergest Biti, sekretar i përgjithshëm i Vëllazërisë Ungjillore, deklaroi se që në momentin që familja Josifi është transferuar në Tiranë, asnjë prej vajzave nuk rezulton anëtare në kishat e tyre.
Megjithatë ai u shpreh se ato kanë qenë anëtare para 15 vitesh në Kishën Ungjillore në Përmet. Atëherë sipas tij është momenti i fundit ku ato rezultojnë të regjistruara.
“Në bazë të komunikimeve që kemi pasur përpara 15 vitesh kanë qenë pjesë e Kishës Ungjillore në Përmet, por pas 15 vitesh kur janë zhvendosur në Tiranë mund të kenë qenë vizitore në Kisha, por nuk rezultojnë në asnjë kishë të Tiranës anëtare”, tha Biti.
Vetë Biti deklaroi se është pastor në zonën e Kombinatit, por asnjëherë nuk ka dëgjuar për vajzat e familjes Josifi. Sipas tij, ato mund të kenë qenë vizitore në Kisha, por nuk figurojnë në listat e Kishës Ungjillore.
“Kishat janë të hapura për takime, mund të vijnë njerëz të ndryshëm, por nuk kanë qenë të regjistruara si pjesë anëtare e Kishës të paktën për vite të tëra me radhë. Jam pastor në zonën e Kombinatit dhe nuk kam dëgjuar asnjëherë për këtë familje. Edhe gjatë kohës së pandemisë kemi vizituar disa qindra familje, të cilat i kemi të regjistruar dhe ndihmuar në mënyra të ndryshme dhe nuk na ka rezultuar kjo familje. Mbi 10 vjet kam qenë pjesë e kishës në Kombinat dhe ato nuk kanë qenë pjesë”, tha ai.
Ndërkohë kryetari i Vëllazërisë Ungjillore të Shqipërisë, Ylli Doci, deklaroi se mediat kanë interpretuar pa fakte implikimin e Kishës me këtë ngjarje. Ai u shpreh se të gjitha fetë në Shqipëri besojnë tek ringjallja.
“U informuam për familjen Josifi dhe tragjedinë e tyre. Ngushëllojmë familjarët për humbjen e pakuptimtë të jetës në izolim. Vërejmë një fenomen të rrezikshëm në media për daljen në interpretime absurde duke implikuar fenë apo segmente fetare me papërgjegjshmëri. Qysh në fillim u sugjerua pa fakte që ishin Dëshmitarë të Jehovait dhe u theksua ideja e ringjalljes si problematike.
Fakti është që të gjitha fetë në Shqipëri besojnë në ringjallje dhe në fakt këto fe dhe vetë ideja e ringjalljes është faktor inkurajimi për një jetë heroike përballë çdo sfide dhe jo një kapitullim përpara sfidave dhe përpara vdekjes. Zhvillimet e implikimeve të këtyre në Kishat Ungjillore jepet si shpjegim të motivimit të veprimeve të tyre duke helmuar pa të drejtë perceptimin e njerëzve që kanë për kishat”.
Doci deklaroi se Kisha Ungjillore nuk e predikon vetëvrasje, përkundrazi, aktet e anëtarëve të familjes Josifi janë të pakuptimta për këtë besim.
“Nëse vajzat kanë qenë ungjillore, kanë besuar do të arrij në këtë konkluzion që kjo që ato kanë bërë do të ishte dështim i besimit tonë. Nëse një ungjillor arrin të shkojë kundër besimit të vet, siç shkojnë këto vajza duke vdekur nga uria kjo është e pakuptimtë për fenë tonë”.
