Lëvizja Vetëvendosja në Tiranë kujton 19-vjetorin e rënies së dëshmorit të kombit Skerdilajd Llagami, i njohur si komandant “Shpendi”, në UÇK.
Aktivistët Boiken Abazi, Klejd Këlliçi, Erald Korra dhe Ago Nuhaj, u takuan me babain e “Shpendit”, profesor Bardhyl Llagamin, bën me dije VV dhe shton se së bashku, ata kryen homazhe në Varrezat e Dëshmorëve të Kombit, pranë varrit të Skerdilajd Llagamit, dhe më tej diskutuan mbi angazhimin e komandant “Shpendit” në tre luftra çlirimtare në Kosovë, në Kosovën Lindore dhe në Maqedoninë e Veriut.
“Dëshmorët e kombit na tregojnë rrugën përpara”, shprehet VV në një reagim.
Reagimi i plotë
Dëshmorët e kombit na tregojnë rrugën përpara
Në 19 vjetorin e rënies së dëshmorit të kombit Skerdilajd Llagami, i njohur si komandant “Shpendi”, aktivistët Boiken Abazi, Klejd Këlliçi, Erald Korra dhe Ago Nuhaj, u takuan me babain e “Shpendit”, profesor Bardhyl Llagamin. Së bashku, ata kryen homazhe në Varrezat e Dëshmorëve të Kombit, pranë varrit të Skerdilajd Llagamit, dhe më tej diskutuan mbi angazhimin e komandant “Shpendit” në tre luftra çlirimtare në Kosovë, në Kosovën Lindore dhe në Maqedoninë e Veriut. “Shpendi” ishte nga Tirana. Ai kishte aftësi të mëdha ushtarake, përgatitje politike kombëtare dhe guximin për të udhëhequr misione tejet të vështira të UÇK-së. Skerdilajd Llagami ka mbetur i paharruar në zemrat dhe mendjen e familjarëve të tij, të rrethit të tij shoqëror dhe kolegëve në Tiranë, por edhe të të gjithë bashkëluftëtarëve. Në vitin 2012, ai është dekoruar pas vdekjes nga Presidenti në Shqipëri me “Medaljen e Artë të Shqiponjës”.
Profesor Bardhyl Llagami i dhuroi aktivistëve disa kopje të librit që ai ka shkruar, të titulluar “Krahët e Shpendit”, i cili përmbledh fakte që lidhen me angazhimin, meritat dhe mirënjohjet ndaj Skerdilajd Llagamit. Në libër profesor Llagami ka përfshirë edhe të dhënat e shoqatave të veteranëve të luftës që tregojnë se në tre luftrat e UÇK-së kanë rënë dëshmorë 71 qytetarë të Republikës së Shqipërisë. Mes këtyre dëshmorëve spikatin edhe emrat e dy vajzave: Liri Lusha dhe Merita Cahani.
Në një kohë kur disa përfaqësues të institucioneve të Republikës së Shqipërisë po flasin sot në mbrojtje të UÇK-së, konstatojmë se në Republikën e Shqipërisë nuk ka as edhe një monument, apo memorial, që përkujton sakrificën sublime të 71 dëshmorëve të UÇK-së nga Republika e Shqipërisë. Për më tepër, Bashkia e Tiranës ka marrë vendim prej vitit 2010 për të ngritur në Tiranë një përmendore për dëshmorin Skerdilajd Llagami, por sot e kësaj dite ky vendim nuk është zbatuar.
Dëshmorët kanë dhënë gjithçka për lirinë e atdheut dhe nuk kërkojnë përmendore. Si shoqëri, jemi ne ata që kemi nevojë të ngrejmë përmendoret e tyre, që të na kujtojnë gjithnjë se sa e shtrenjtë është liria. Për më shumë, si shoqëri e si institucione, kemi nevojë të zhvillojmë e zbatojmë politika që na çojnë përpara në rrugën që na kanë treguar dëshmorët e kombit, për liri dhe drejt bashkimit.
Lavdi UÇK-së dhe të gjithë dëshmorëve të kombit.
