Banka e Shqipërisë do të fitojë për herë të parë akses në instrumentet e likuiditetit të Bankës Qendrore Europiane. Sipas burimeve të TV Scan, edhe banka jonë qendrore do të ketë akses në instrumentin e shpallur të enjten, të quajtur EUREP.
Instrumenti i ri pritet të hyjë në fuqi brenda një viti dhe ka si qëllim plotësimin e nevojave për likuiditet të sistemeve financiare dhe ekonomive të vendeve që nuk bëjnë pjesë në zonën Euro. EUREP do të jenë marrëveshja të anasjellta të riblerjes për kreditimin e bankave qendrore, të garantuara me instrumente financiare në monedhën europiane. BQE-ja u shpeh të enjten se ky instrument do të adresojë nevoja për likuiditet në euro të shkaktuara nga kriza e Covid-19 dhe qëllimi është të evitohen efektet e skenarëve negativë në mekanizmin e transmetimit të politikës së saj monetare.
EUREP është konceptuar si një plan kontigjence, për t’u përdorur vetëm nëse paraqiten rrethana të paparashikuara negative për ekonomitë jashtë Eurozonës.
Megjithatë, të pasurit akses në likuiditetet në euro të BQE-së është një zhvillim i rëndësishëm për Bankën e Shqipërisë, por edhe për bankat e tjera të rajonit. Për shkak të nivelit të lartë të euroizimit të ekonomisë dhe sistemit financiar, aksesi në një facilitet emergjence në euro përbën një element shtesë besimi për tregun dhe ekonominë. Pikërisht për shkak të niveleve të larta të euroizimit, prej disa vitesh Banka e Shqipërisë ka ndërmarrë një stretgji të rritjes së rezervës valutore të vendit, që tashmë ka arritur nivelin e 3.6 miliardë eurove ose afërsisht sa 26% e Prodhimit të Brendshëm Bruto./SCAN
