“Kurdisja e një histerie antieuropiane!” Kështu i quan nënkryetari i Lëvizjes Socialiste për Integrim, Petrit Vasili, reagimet lidhur me hetimet e nisura ndaj Presidentit të Kosovës, Hashim Thaçi dhe ish-kryeparlamentarit Kadri Veseli.
Ai thotë se një histeri antieuropiane, e kurdisur trashë, është shfaqur ngado me regji të Edi Rames gjoja në emër të mbrojtjes së luftëtarëve të Kosovës.
Sipas tij, përdorimi i lig nga Rama i ngjarjeve të fundit, që lidhen me Hashim Thaçin dhe Kadri Veselin është vetëm krijimi i prej tij një fokusi artificial për të shpërqendruar opinionin nga vetja dhe përgjegjësitë e rënda të tij.
“Hashimi dhe Kadriu dy luftëtarë të shquar të vijës së parë për çlirimin dhe pavarësinë e Kosovës janë dy burra vepra e të cilëve flet vetë. Sakrificat dhe trimëria e tyre nuk ka nevojë aspak për avokatinë e frikacakut Edi Rama. Se sa i respekton luftëtarët për liri të Kosovës dhe sa sinqerisht flet për ata Rama, të gjithë e kanë të qartë, që pas veprimeve ndaj një luftëtari të paepur si Haradinaj të cilin edhe paditi në mënyrë ordinere në Gjykatë”, shkruan Vasili në një postim në rrjetet sociale.
Ai thotë se histeria antieuropiane në emër të gjoja mbrojtjes së luftëtarëve të Kosovës është thjesht dhe vetëm thika pas shpine e radhës e Ramës ndaj tyre dhe ndaj Kosovës.
Në vijim, shton se të gjithë e njohin botërisht rolin e Europës, të Anglisë, Gjermanisë etj., në çlirimin e Kosovës.
Vasili shpehet se asnjë nuk e ka harruar gjeneralin anglez Sir. Michael Jackson personalitetin më të lartë pas luftës së dytë botërore të ushtrisë britanike, që drejtoi në Kosovë në momentet më kritike të saj dhe se Kosova e pavarur është një vepër madhore e SHBA dhe Europës.
“Antieuropianizmi i histerik i Ramës është dëmi më i madh që mund ti bëhet Kosovës, e cila Europën dhe integrimin europian i ka prioritetin më madhor të saj. Izolimi dhe armiqësimi i Kosovës me Europën është objektivi më i madh i të gjithë antishqiptarëve, që përfaqëson Edi Rama. Vetëm për shkak të Ramës sot Shqipëria është në momentin më të keq të integrimit europian të saj dhe në udhëkryqin më të rrezikshëm të ekzistencës së saj. 15 kushtet për hapjen e negociatave për anëtarësim në BE, janë prova e zhbërjes së shtetit dhe kursit antieuropian të rilindjes. Krimi, droga, korrupsioni, pastrimi i parave, votimet moniste dhe shkatërrimi i të gjithë institucioneve të vendit në Shqipëri janë fakte tronditëse që po shkatërrojnë të tashmen dhe të ardhmen e saj”, deklaron Vasili.
Ai shton se Shqipëria nga një aleat e ndihmë për Kosovën, është thjesht dhe vetëm një problem i madh më shumë dhe një avokat me vlerë negative i saj dhe se përballë kësaj situate vetëm propaganda dhe shteti i propagandës janë ato, që drejton realisht Edi Rama.
Vasili shprehet se për të shpërqendruar vëmendjen nga përgjegjësitë e rënda për izolimin e vendit dhe krizën e tmerrshme ekonomike, që e ka mbërthyer, Rama është lëshuar të fitojë minuta propagandë dhe mbijetesë politike për veten e tij, duke shpërdoruar pabesisht ngjarjet në Kosovë.
“Hashimi dhe Kadriu pa ju dridhur syri janë përballur me kasapin e Ballkanit Milosheviçin dhe kanë fituar beteja të mëdha. Ata do të përballen edhe me këtë betejë të re dhe do ta fitojnë edhe atë. Një Shqipëri dinjitoze dhe autoritare sigurisht do të ishte një mbështetje për ta. Shqipëria e Edi Ramës është e kundërta, sepse përveç problemeve nuk është në gjendje të ofrojë asgjë tjetër. Imoraliteti antieuropian i Ramës është zgjatim i skenarit të errët të tij për ta mbajtur Shqipërinë larg Europës dhe për ta bërë pre të interesave të errëta që shohin në të kundërt të Perëndimit, që pasurojnë Ramën dhe rrënojnë shqiptarët”, deklaron ai.
Vasili thotë se kurdisja e kësaj histerie antieuropiane në emër gjoja të luftëtarëve të UÇK është një strategji e pabesë kundër të gjithë shqiptarëve në Kosovë dhe Shqipëri.
Në mbyllje, deklaron se ajo duhet përbuzuar dhe neveritur si produkt i një antishqiptari si Edi Rama.
