Policia e Pogradecit ka ekzekutuar operacionin “Llënga” për goditjen e veprimtarisë së paligjshme të prerjes së pyjeve dhe si rezultat janë proceduar penalisht 7 shtetas dhe një person është vënë në pranga.
Mësohet se 5 prej të proceduarëve janë punonjës të Administratës së Zonave të Mbrojtura dhe janë proceduar për “Shpërdorim detyre” dhe 2 të tjerë për veprën “Prerja e paligjshme e pyjeve”.
Pas hekurave ka përfunduar shtetasi A.Xh., 33 vjeç, banues në fshatin Vërdovë.
Ndërsa ka fiolluar procedimi penal në gjendje të lirë ndaj shtetasve:
F. K., 27 vjeç, banues në fshatin Vërdovë, A. J., 60 vjeç; G. B., 31 vjeç; M. B., 37 vjeç; E. Sh., 38 vjeç; E. G., 59 vjeçe, (me detyrë teknik dhe inxhinierë pranë ADZM-Korçë).
“Në afërsi të fshatit Vërdovë, shërbimet e policisë kanë konstatuar shtetasit A.Xh., dhe F. K., duke transportuar me mjetet respektive “Benz”, pa targa, të ngarkuara me sasi dru zjarri, pa dokumentacion përkatës. Shtetasi A.Xh., drejtonte mjetin pa leje drejtimi, ndërsa pesë punonjësit e lartpërmendur dyshohet se kanë shpërdoruar detyrën duke mos kryer kontrolle dhe favorizuar shtetasin F. K., në zonën mbrojtur të pyllit të fshatit Llëngë-Pogradec.” thuhet në njoftimin e policisë.
Materialet i kaluan Prokurorisë pranë Gjykatës së Shkallës së Parë Pogradec për veprat penale “Prerja e paligjshme e pyjeve” , “Drejtimi i automjeteve në mënyrë të parregullt” dhe “Shpërdorimi i detyrës”.
