Kryeministri Edi Rama bën të ditur se sot nis dhënia e granteve të para të rikonstruksionit dhe riparimit të banesave të dëmtuara nga tërmeti i 26 nëntorit. Sipas Ramës, janë 9429 përfitues dhe se për ta do të shpërndahet një fond pre 30 mln dollarësh për 9 bashki të vendit.
Nga tërmeti i 26 nëntorit janë dy kategori që u prekën, ata që humbën shtëpitë dhe u sistemuan me qira, deri në momentin e ndërtimit të shtëpisë, dhe ata në fshat, që u sistemuan në çadra apo kontenierë, pranë tokave të tyre.
Gjithashtu edhe familjet, banesat e të cilëve u konsideruan si të riparueshme, do të marrin fonde direkte për riparimet dhe procesi po vazhdon sot në bashkinë e Kamzës, ku ka nisur dhënia e mbështetjes financiare në Postë te familjet përfituese.
9 bashki kanë miratuar listat e përfituesve me vendim të Këshillit Bashkiak, konkretisht bashkitë Shijak, Kamzës, Rogozhinë, Kurbin, Mirditë, Vorë, Kavajë, Krujë e Tiranë, kjo e fundit pjesërisht.
Sipas Ramës, pritet që këtë javë të ecim edhe më shumë me Tiranën e Durrësin.
“Janë 9429 përfitues, shuma është 30 mln dollarë që po shpërndahet te qytetarët. Sot, Bashkia e Kamzës në total sot shpërndan 163 mln lekë tre kategori përfituesish”, tha Rama.
