Policia ka vënë në pranga një 32-vjeçar, pasi dyshohet se mund të jetë i implikuar në vrasjen e Hekuran Billës në 11 qershor te “Komuna e Parisit” në kryeqytet.
Pas hekurave ka përfunduar shtetasi Andi Agraja, banues në Shkodër.
“Gjatë kontrollit të ushtruar në një lokal, ky shtetas, në momentin e ndërhyrjes së shërbimeve të Policisë është larguar me vrap, duke hedhur në tokë një çantë, brenda së cilës Policia gjeti dhe sekuestroi një armë zjarri tip pistoletë, me një krehër me 7 fishekë kalibër 9 mm. Uniformat blu kanë vijuar ndjekjen dhe pas disa minutash kanë bërë të mundur kapjen e tij. Materialet i kaluan Prokurorisë së Rrethit Gjyqësor Tiranë, për veprime të mëtejshme, për veprën penale “Armëmbajtja pa leje”, për të cilën parashikohet dënimi deri në 7 vjet burgim.” thuhet në njoftimin e policisë
Më herët, lidhur me vrasjen e Hekuran Billës, është arrestuar Viktor Marku, i dyshuar si autori kryesor i atentatit, si dhe 22-vjeçari Sebastian Mali (nipi i Viktor Markut), i dyshuar si bashkëpunëtor në vrasje.
Viktori është vëllai i Prel Markut të vrarë në vitin 2006 në Angli nga Hekuran Billa dhe ngjarja dyshohet se është bërë për hakmarrje.
