Operacioni Forca e Ligjit i ka dërguar ditën e sotme formularët e vetë-deklarimit të pasurisë, dy shtetasve me banim në Sarandë e Vlorë dhe një shtetaseje me banim në Elbasan, në kuadër të operacionit anti-KÇK, të nisur prej fillimit të shkurtit.
Sipas burimeve zyrtare, OFL u ka dërguar kërkesat për vetëdeklarim të pasurisë, shtetasve:
K. D., banues në Sarandë, i dënuar nga Gjykata e Shkallës së Parë për Krimet e Rënda, për veprën penale “Vjedhja e mbetur në tentativë, në kuadër të gupit të strukturuar kriminal”;
M. D., banues në Vlorë, i cili ka lidhje familjare me subjektin K. D., si rrjedhojë është subjekt i nenit 16 të Aktit Normativ Nr.1, datë 31.01.2020;
Z. Gj., banuese në Elbasan, e dënuar nga Gjykata e Shkallës së Parë për Krimet e Rënda, për veprën penale “Prodhimi dhe shitja e narkotikëve, e kryer në bashkëpunim”.
Burime bëjnë me dije se këta shtetas janë: Klaudio Dervishi, Myftar Dervishi dhe Zamira Gjongecaj.
“Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.” thuhet në njoftimin e OFL-së
Kush është Zamira Gjongecaj?
Zamira Gjongecaj u arrestua në vitin 2005 nën akuzan e shpërndarjes së drogërave të forta në Tiranë. Ajo u vu në pranga së bashku me disa persona të tjerë pas 4 muajsh hetime, ndërkohë pas arrestimit, për të gjetur lidhjet mes tyre, si dhe prova të tjera më të plota për dosjen, u mbajtën në një dhomë në ambientet e Drejtorisë së Policisë Tiranë. Prokuroria vendosi përgjues në dhomën e izolimit, ku regjistroi bisedat e të arrestuarve duke zbardhur lidhjet që ekzistonin mes tyre.
Në banesën e Zamira Gjongecajt u gjet 5 kg heroinë. Kreu i grupit ku ishte pjesë dhe Zamira Gjongecaj ishte Besnik Braka, nga Elbasani. Droga, sipas akuzës, ishte destinuar të nisej drejt Italisë. Ndërkohë akuzoheshin se të gjithë pjesëtarët e grupit merreshin edhe me shpërndarjen e heroinës në vend. Një nga këto shpërndarëse ishte edhe Zamira Gjongecaj.
Zamira Gjongecaj është nga Elbasani. Në Tiranë, ajo, sipas prokurorisë, jetonte në një shtëpi me qira, ndërsa punonte si parukiere. Mësohet se Zamira ishte e dashura e kreut të grupit Besnik Brakës. Policia dyshonte për një lidhje mes saj dhe Brakës, por asnjëherë nuk ishin të bindur plotësisht. Në atë kohë, Gjongecaj u shpreh para togave të zeza se ishte shtatzënë prej dy muajsh, duke kërkuar një masë më të butë arresti.
