Gjashtë persona janë arrestuar nga policia e Tiranës dhe një tjetër është shpallur në kërkim në kuadër të operacionit “Mozaiku”, pasi kanë tentuar të vidhnin me dhunë dhe nën kërcënimin e armës, në një banesë. 4 ditë më parë, gjatë operacionit policor të koduar “Eksplozivi”, është arrestuar dhe një pjesëtar i këtij grupi.
Pas hekurave kanë përfunduar shtetasit S. Q., 30 vjeç, i dënuar më parë për vjedhje në bashkëpunim, P. S., 23 vjeç, A. K., 28 vjeç, E. H., 25 vjeç, K. M., 33 vjeç dhe A. K., 31 vjeç, të gjithë banues në Tiranë. Si dhe është shpallur në kërkim shtetasi A. Sh., 29 vjeç, banues në Tiranë.
“Në rrugën “Frederik Shiroka”, këta shtetas kanë tentuar të vjedhin me armë në banesën e shtetasit E. M, por nuk kanë mundur, pasi janë diktuar nga të zotët e banesës. Nga veprimet hetimore të kryera ka rezultuar se shtetasi F. A., 28 vjeç, banues në Tiranë, i cili është arrestuar gjatë operacionit policor të koduar “Eksplozivi”, si autor i dyshuar për veprën penale “Shkatërrim i pronës me eksploziv”, ngjarje e ndodhur më datë 11.06.2020, në rrugën “Dëshmorët e 4 Shkurtit” Tiranë, është bashkautor edhe në këtë ngjarje. Gjate veprimeve hetimore janë sekuestruar në cilësinë e provës materiale sendet si më poshtë: Një armë zjarri pistoletë, veshjet e përdorura gjatë tentativës për vjedhje, një sasi municioni luftarak, dy automjete dhe 5 telefona celularë. Nga veprimet hetimore të kryera dyshohet se shtetasit S. Q. dhe E. H., në bashkëpunim me shtetasin E. K. (i arrestuar më parë), janë autorë të vjedhjes së banesës së shtetasit M. Sh., ngjarje e ndodhur në muajin prill 2020.” thuhet në njoftimin e policisë.
Nën drejtimin e Prokurorisë vijon puna për dokumentimin e vjedhjeve të tjera që dyshohet se janë kryer nga këta persona.Materialet do t’i dërgohen Prokurorisë së Rrethit Gjyqësor Tiranë, për veprime të mëtejshme, për veprat penale “Vjedhja me armë” e kryer në bashkëpunim, mbetur në tentativë dhe “Armëmbajtja pa leje”.
