Eksperti i arsimit, Ndriçim Mehmeti, përmes një postimi në rrjetet sociale, i është drejtuar zv.ministres Nina Guga, që të dëgjojë maturantët dhe t’u japë një shpjegim lidhur me Turin, por edhe me gjithë dilemat që ato kanë.
“Nina hiqe petkun e zv. Ministres!
Po ju drejtohem me emër, pasi njihemi prej vitesh bashkë. Ke qenë drejtoreshë e mirë. Kthehu në rolin tënd, merri maturantët në zyrë, jepu një shishe ujë dhe sqaroi për Turin e gjithë dilemat që kanë.
Beje Nina, që te mbahesh mend për një gjë të mirë, në gjithë atë maskarrallëk që ka mbuluar MASR.
Bëje Nina, si nënë mësuese, drejtuese e shkollës. Nese nuk e bën, atëherë je njelloj si ata madje edhe më keq se ata.
Besa do të iki në Kosovë dhe do të shijoj lekët e marra pa mund në dheun amë, ndersa ti do dalësh në rrugë dhe do përballesh me ata maturantë që sot i sheh nga dritarja e zyrës tënde të freskët”, shkruan Mehmeti.
Reagimi i tij vjen në një kohë kur maturantët prej ditës së premte protestojnë para Ministrisë së Arsimit, ndërsa kërkojnë rivlerësim të testit të Gjuhës Shqipe dhe Letërsisë. Ata kanë paralajmëruar se mund të bojkotojnë provimin e 3-të të maturës, që zhvillohet nesër.
