Vendoset sekuestro preventive për një pallat 9-katësh në Durrës.
“Në vijim të veprimeve të kryera nga Specialistët për Hetimin e Krimit Ekonomik e Financiar, nën drejtimin e Prokurorisë së Rrethit Gjyqësor Durrës, për veprën penale ‘Shpërdorim detyre’, në ngarkim të shtetasit Hysen Gashi, ish-kryetar i komunës Rrashbull, pas informacioneve që dispononte Policia, veprimet janë intensifikuar më tej për verifikimin e lejeve të ndërtimit të lëshuara për çdo objekt. Me urdhër të prokurorit të Prokuroisë Durrës u bë ekzekutimi i vendimit penal të Gjykatës së Shkallës së Parë Durrës, për vendosjen e masës së sigurimit pasuror, ‘Sekuestro preventive’, si dhe në bashkëpunim me IKMT-në u urdhërua pezullimi i punimeve që kryheshin në objektin pallat 9-katësh + papafingo +1 kat nën tokë, me administrator shtetasin J. A., banues në Durrës, ndërtim në zonën e Shkëmbit të Kavajës”, njoftoi policia.
“Shuma e sekuestrimit kap vlerën 1.5 milionë euro, sipas çmimit të tregut”, shtuan te njejtat burime.
Hysen Gashi u arrestua në korrik të 2014, pasi në bashkëpunim me 6 persona të tjerë u akuzuan për dhënien e lejeve abuzive për 16 pallate në Shkëmbin e Kavajës. Në korrik 2017 Gjykata e Apelit në Durrës e dënoi me 4 muaj e 15 ditë burg, me akuzën e shpërdorimit të detyrës për dhënien e lejeve të ndërtimit.
