Ka përfunduar seanca e parë për ish-kryebashkiakun e Vorës, Agim Kajmaku, i cili ndodhet ende në arrati nën masën “arrest me burg” në mungesë. Gjykata Penale e Tiranës ka pranuar provat e dorëzuara nga Prokuroria dhe avokatët e ish-zyrtarit.
Seanca e radhës do të zhvillohet në 18 qershor, ora 10:00 dhe mësohet se do të merren në pyetje dëshmitarët Gentian Picari, Laureta Omeri dhe Hekuran Brahimaj.
Ish-kryebashkiaku po gjykohet në mungesë për akuzat e “falsifikimit të formularëve”, “falsifikimit të dokumenteve” dhe “kryerje e funksionit pas dhënies fund të tij”.
Të bashkëpandehura me Kajmakun janë dhe Merita Shytko e Irma Bylyku të akuzuara për “falsifikim dokumentesh” dhe Mirjeta Mema për “shpërdorim të detyrës”.
Agim Kajmaku u denoncua nga Partia Demokratike për fshehje të dënimit në formularin e Dekriminalizimit, pasi nën emrin Jorgo Tota ai ishte dënuar në Greqi për falsifikim parash. Pas hetimeve dhe verifikimeve nga Prokuroria, akuzat e opozitës rezultuan të vërteta, duke bërë që KQZ ta shkarkojë atë nga detyra e kryebashkiakut.
