Ish-deputeti i Partisë Demokratike, Ervin Salianji është shprehur se zërat që i kanë shërbyer qeverisë nuk mund t’i shërbejnë Partisë Demokratike, duke theksuar më tej se pavarësisht këtij fakti dyert në PD nuk janë mbyllur për askënd.
I ftuar në emisionin “Në Fokus” në televizionin TVT, Salianji tha se zërat që i shërbejnë qeverisë nuk ka se si të jenë me opozitën, por derën nuk e kanë të mbyllur edhe pse opozita s’mund të jetë privilegj në Shqipëri, por sakrificë.
“Meqë ju përmendet një rast, rasti në fjalë është përjetësisht anëtare e Këshillit Kombëtar dhe këtë të drejtë ia ka dhënë Lulzim Basha, por që s’ka ardhur asnjë ditë të vetme. Kreu i PD-së e ka realizuar hapjen, duke futur në Këshillin Kombëtar emra që kanë pasur funksion të lartë në qeverisjen e PD-së”, tha ai.
Sipas tij, elitat politike duhet të ndryshojnë dhe problem do të ishte në rast se ato nuk do të ndryshonin.
Ish-deputeti demokrat tha se shpreson që në Partinë Demokratike të bashkohen të gjithë ata emra që s’kanë ndonjë cen dhe asnjë kosto politike nga qeverisja e mëparshme e demokratëve.
I pyetur në lidhje me zgjerimin e frontit opozitar jo vetëm për ata emra që i janë larguar PD-së dhe opozitës shqiptare, por për intelektualë dhe njerëz me ndikim në shoqëri, Salianji u shpreh se PD gjatë gjithë kësaj periudhe u ka bërë thirrje intelektualëve, njerëzve me ndikim në shoqëri, aktivistëve dhe jo vetëm atyre që t’i bashkohen alternativës së opozitës me qëllim zgjerimin e frontit opozitar përballë qeverisë.
“Ne gjatë gjithë kohës kemi bërë thirrje për bashkëpunim dhe kemi caktuar detyra konkrete për degët e partisë dhe strukturat e partisë për të takuar e thirrur dhe përfshirë çdo përfaqësues, i cili ka reputacion në komunitet, por edhe për hapjen që duhet të vijë dhe duhet bërë drejt profesionistëve, drejt njerëzve me kontribute në shoqëri dhe drejt njerëzve që kanë një reputacion publik dhe që hap pas hapi Partia Demokratike dhe kryetari Basha do t’i prezantojë për publikun për të treguar qytetarëve që ne jo vetëm jemi gati me alternativën dhe ekipin, por edhe me një lloj hapje të mëtejshme drejt shoqërisë”, tha ish-deputeti demokrat për TVT.
