Elbasani u trondit mëngjesin e sotëm nga një atentat me armë zjarri ku shënjestër ishte 55 vjeçari Ardian Çapja.
Çapja është qëlluar në rrugicën pas banesës së tij, dyshohet nga një makinë në lëvizje, duke marrë një plumb në shpatull. Grupi hetimor zbuloi pas ngjarjes se Ardian Çapja ishte qëlluar nga një armë automatike e modifikuar si snajper. Ndërsa autorët dogjën automjetin, një furgon pasagjerësh me targa ta falsifikuara, në zonën e Fushë-Mbretit.
55-vjeçari Ardian Çapja, nga spitali Rajonal i Elbasanit, është transportuar në Spitalin e Traumës ku do t’i nënshtrohet një ndërhyrje kirurgjikale.
Familjarët e tij thanë se Çapja ishte rrëzuar në banesë, por ishte Policia që sqaroi se bëhej fjalë për një atentat. Ndërkohë forca të shumta policie dhe RENEA-s kanë zbarkuar në Elbasan dhe kanë ngritur disa pika kontrolli. Po ashtu, kanë shoqëruar në cilësinë e dëshmitarët disa persona.
E kaluara
Ky është atentati i tretë ndaj Ardian Çapjas. Ai i ka shpëtuar edhe dy atentateve të mëparshme, në gusht dhe dhjetor të vitit 2017. Edhe dy atentateve të mëparshme ai u ka shpëtuar me plagë të lehta. Në gusht 2017, shtëpa e Çapjave u sulmua me predhë antitank. Objektiv ishte Ardian Çapja. Ndërsa 6 muaj më pas, në dhjetor 2017, ndaj Ardian Çapjes u hap zjarr nga një automjet në lëvizje. Persona të paidentifikuar kanë survejuar zonën për disa kohë dhe kanë parë që Ardiani ka qenë shumë pranë lokalit të tij, duke lëshuar breshëri plumbash drejt tij, por nga ngjarja fatmirësisht nuk pati të lënduar.
Atentatet ndaj tij, sipas hetuesve, lidhen me konflikte të vjetra që fisi i tyre ka pasur në qytetin e Elbasanit. Më 3 shkurt 2016 u vranë tre pjesëtarë të kësaj familjeje, kurse Florenc Çapja i shpëtoi një atentati të ndodhur në qershor 2016, ku mbeti i plagosur shoku i tij, Bledar Muça, me të cilin po udhëtonte në një makinë. Ndër vite, familja Çapja është akuzuar si e përfshirë në ngjarje kriminale, por edhe ka qenë pre e tyre.
Gjithçka ka nisur në vitin 2005, ku Sokol Çapja u përfshi në konflikt me ish-kreun e Qarkullimit Rrugor në Elbasan, Fadil Mema. Pas kësaj ngjarjeje mbeti i vrarë Sokol Çapja dhe si autorë u akuzuan nipat e oficerit të Policisë. Kjo pasoi me vrasjen e kunatit të Memës, Ardian Ibrahimi, në maj 2006.
Në vitin 2012, Gentian Beqiri, një nga të akuzuarit për vrasjen e Sokol Çapjes, u ekzekutua, ndërsa ishte lënë në arrest shtëpie. Ndërsa në mars 2015, në Torino të Italisë, u ekzekutua Fadil Mema.
Më pas, në shkurt 2016, mbetën të vrarë Agron Çapja, nipi i tij Ardit Sinakoli dhe Eno Bedalli, ndërsa mes tetë të plagosurve ishte dhe Florenc Çapja.
Ndërsa në qershor 2016, Ardian Çapja, Florenc Çapja dhe Bledar Muça u arrestuan për sulm ndaj disa efektivëve civilë të Policisë pasi dyshonin se do të kryenin atentat ndaj tyre.
