Gjatë ditës së sotme në rrjetet sociale kanë qarkulluar disa fotografi, ku thuhej se babai i Vjosa Osmanit ishte pjesë e policisë serbe. Për këtë ka reaguar ashpër kryetarja e Kuvendit të Kosovës. Ajo shprehet se ky sulm ka qenë i pritshëm prej saj, ndërsa shton se do të denoncojë shpifësit.
“Përkrahësit e tregtarëve të kufijve paskan gjetë një fotografi të dy policëve serbë dhe pa fije turpi gënjejnë se njëri nga ta në foto është babai im Raif Osmani. Natyrisht që në atë foto nuk është babai im e natyrisht që edhe gënjeshtra se ai ka punuar për serbët është shpifje e radhës e atyre që sot e kthyen Kosovën në varësi të Beogradit.
Për fatin e keq të vendit tonë, shpifjeve të tilla u shërbejnë edhe disa pseudo-portale të shndërruara të mjete propagandistike të tregtarëve të kufijve. E edhe më fatkeqe është kur shoh disa që e quajnë veten aktivistë të LDK-së tek shpërndajnë shpifje të tilla teksa harrojnë që po këta që po i montojnë këto gënjeshtra sot, dje nga hotele të Shqipërisë përgatisnin komunikata e shpallnin tradhtarë veprimtarët më të mirë të LDK-së” – thotë ndër të tjera Osmani.
Ajo thotë se babai i saj është larguar nga puna më 15 mars të vitit 1989 duke u bërë ndër shqiptarët e parë që u larguan dhunshëm nga puna nga regjimi serb sepse ka besuar dhe ka folur publikisht për Kosovën Republikë.
Osmani thotë se ai në fillim të viteve 90 i është bashkuar përpjekjeve të para të Presidentit Rugova për të ndërtuar shtyllat e mbrojtjes për rajonin e Mitrovicës (në sistemin paralel) dhe për këto përpjekje është burgosur dhe ka përjetuar tortura çnjerëzore në burgjet serbe.
“Por, shpifësit e këtyre ditëve po dëshirojnë ta barazojnë sistemin jugosllav me atë të ndërtuar nga Presidenti Rugova. Të bësh një barazim të tillë duke u shërbyer me montime e fotografi të policëve serbë dhe të tentosh të denigrosh dikë që ka punuar për Kosovën shtet të pavarur e sovran që nga viti 1989, është e pafalshme dhe joetike. Prandaj edhe familja ime do të ndërmarrë të gjitha masat ligjore ndaj portaleve që po i shkruajnë këto shpifje e montime si dhe ndaj individëve shpifës që po i shpërndajnë ato” – shkruan Osmani.
Një reagim ka pasur edhe kryetari i LDK-së Isa Mustafa që është përpjekur të distancohet nga sulmi që po i bëhet Kryetares së Kuvendit edhe nga brenda partisë së saj.
“Mospajtimet institucionale, rivalitetet partiake dhe politike duhet ti shprehim dhe debatojmë ndërmjet nesh, jo permes etiketimit të prindërve, fëmijëve apo familjarëve. Kjo është mënyra më morbide e luftës politike. Nëse dikush ka pasur argumente, pse nuk i prezantoi ato, para se Vjosa të zgjidhej Kryetare e Kuvendit. Përgjigja është se nuk kanë pasur dhe nuk kanë”, – shkroi Mustafa.
