Operacioni Forca e Ligjit i ka dërguar ditën e sotme formularët e vetëdeklarimit të pasurisë, dy shtetasve me banim në qytetin e Lezhës dhe një me banim në Kurbin, në kuadër të operacionit anti-KÇK, të nisur prej fillimit të shkurtit.
Sipas burimeve zyrtare, OFL u ka dërguar kërkesat për vetëdeklarim të pasurisë, shtetasve:
– G. Ç., banues në Kurbin, i dënuar për veprën penale “Shfrytëzim prostitucioni”;
– A. P., banues në Lezhë, i dënuar për veprën penale “Trafikim i lëndëve narkotike”;
– P. M., banues në Lezhë, i dënuar për veprën penale “Vrasja në rrethana cilësuese”;
Burime bëjnë me dije se bëhet fjalë për shtetasit Gëzim Çelaj, Arben Prendi dhe Perikli Marku.
“Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së, të cilat do t’i dërgohen SPAK-ut, për veprime të mëtejshme”, thuhet në njoftimin e OFL-së.
