Në përvjetorin e tretë të fitores së Ligës së Kampioneve nga ana e Real Madrid kundër Juventusit, Marcelo ka zbuluar se “Los Blancos” e mësuan atë të kishte një shpirt luftarak.
Me atë triumf 4-1 kundër bardhezinjve, Real Madrid fitoi Championsin numër 12 në historinë e tyre ndërsa do të fitonin edhe të 13-in një vit më vonë kundër Liverpool-it.
“Gjëja më e rëndësishme është se kur fitojmë një trofe, nuk mendojmë së ndaluari dhe të shijojmë suksesin që kemi, gjithmonë kërkojmë sfida t reja.” Tha fillimisht Marcelo për Real Madrid TV.
“Gjatë kohës sime këtu, Real Madrid më ka mësuar të luftoj deri në fund. Të fitosh edhe në lojë por edhe në jetë. Kur mendojmë se kemi fituar çdo gjë, duam të fitojmë përsëri. Kështu është ngulitur kultura te ne.”
Fitorja 4-1 kundër Juventusit në Kardif, vlerësohet edhe si kulmi i skuadrës së Realit të Madrit, ndërsa Marcelo ka dhënë opinionin e tij për atë ndeshje.
“E dinim që do të përballeshim me një mbrojtje të fortë që në atë sezon kishte pësuar shumë pak gola në Ligën e Kampioneve. E dinim që mund të shënonim gola por edhe që mund të pësonim.”
“Duhet të ishim më të fortë se ata në mënyrë që të përballonim ndeshjen. Gjatë ndeshjes kuptuam që kishte hapësira dhe trajneri na udhëzonte të kishim durim sepse herët apo vonë do të shënonim.”- ka thënë braziliani.
